sañg haiñ nāvak-e-dushnām haiñ rusvā.ī hai

ye tire shahar kā andāz-e-pazīrā.ī hai

kitnā phailegā ye ik vasl kā lamha āḳhir

kyā sameToge ki ik umr kī tanhā.ī hai

kuchh to yāroñ se milā sañg-e-malāmat hī sahī

kis ne is shahar meñ yuuñ dād-e-hunar paa.ī hai

ek patthar idhar aayā hai to is soch meñ huuñ

merī is shahr meñ kis kis se shanāsā.ī hai

'shauq' jis din se charāġhāñ hai ḳhayāloñ kī galī

jashn sā jashn hai tanhā.ī sī tanhā.ī hai