raat se din kā vo jo rishta thī
shaam thī aur kaisī tanhā thī
ḳhat ke purze paḌe the kamre meñ
ik purānī kitāb bhī vā thī
sab ke matlab ke ḳhvāb the us meñ
shab ke hāthoñ meñ ek puḌiyā thī
raat bhar āñdhiyoñ kā daur chalā
shāḳh par ik udaas chiḌiyā thī
un dinoñ jab vo mere saath hī thā
merī duniyā bhī ek duniyā thī
jhiil jaisī thiiñ us kī hī āñkheñ
baaqī duniyā to ḳhair sahrā thī
āḳhirash Dūbnā paḌā mujh ko
aarzū thī yā koī dariyā thī