us kī āñkhoñ meñ ik savāl sā thā

mere dil meñ koī malāl sā thā

dhul gayā āñsuoñ meñ saarā vajūd

ishq meñ ye ajab kamāl sā thā

jism kī Daal par jhukā thā ḳhvāb

ruuh sarshār dil nihāl sā thā

guftugū kar rahī thī ḳhāmoshī

hijr kī raah meñ visāl sā thā

ḳhvāhisheñ har ghaḌī uruuj pe thiiñ

vaqt ko har ghaḌī zavāl sā thā

maiñ bhī thī āshnā rivāyat se

us ko bhī zabt meñ kamāl sā thā

ḳhvāb-dar-ḳhvāb thiiñ mulāqāteñ

dard-e-dil vaj.h-e-indimāl sā thā

aa.ina ban gayā hai mere liye

ek chehra ki be-misāl sā thā