hamīñ vafāoñ se rahte the be-yaqīn bahut

dil-o-nigāh meñ aa.e the mah-jabīn bahut

vo ek shaḳhs jo dikhne meñ Thīk-Thāk sā thā

bichhaḌ rahā thā to lagne lagā hasīn bahut

tū jā rahā thā bichhaḌ ke to har qadam pe tire

phisal rahī thī mire paañv se zamīn bahut

vo jis meñ bichhḌe hue dil lipaT ke rote haiñ

maiñ dekhtā huuñ kisī film kā vo scene bahut

tire ḳhayāl bhī dil se nahīñ guzarte ab

isī mazār pe aate the zā.erīn bahut

taḌap taḌap ke jahāñ maiñ ne jaan dī hai 'sirāj'

khaḌe hue the vahīñ par tamāshbīn bahut