lahū meñ kyā batā.eñ raushnī kaisī milī thī
milī thī bas mohabbat jis tarah kī bhī milī thī
bahut sī jam.a kar rakkhī thiiñ us ne kahkashā.eñ
maiñ royā to mujhe ik qaash sūraj kī milī thī
uThāte kis tarah palkoñ kī lambā.ī kā jhagḌā
bahut mushkil se āñkheñ aur bīnā.ī milī thī
hayā thī aañkh meñ gandum ke ḳhoshe haath meñ the
ajab hālat meñ thī jab mujh ko uryānī milī thī
yahīñ thī jo nazar aa.ī thī mish.al thī ki ātish
nubuvvat thī ki chiñgārī zamīñ par hī milī thī