ta.alluq toḌ kar us kī galī se
kabhī maiñ juḌ na paaya zindagī se
ḳhudā kā aadmī ko Dar kahāñ ab
vo ghabrātā hai keval aadmī se
mirī ye tishnagī shāyad bujhegī
kisī merī hī jaisī tishnagī se
bahut chubhtā hai ye merī anā ko
tumhārā baat karnā har kisī se
ḳhasāre ko ḳhasāre se bharūñgā
nikālūñgā ujālā tīrgī se
tumheñ ai dosto maiñ jāntā huuñ
sukūñ miltā hai merī bekalī se
havāoñ meñ kahāñ ye dam thā 'faisal'
diyā merā bujhā hai buzdilī se