ḳhāmushī ko sadā meñ rakkhā gayā
ek jaadū havā meñ rakkhā gayā
chāk-e-jāñ se utaar kar kuuza
sahn-e-āb-o-havā meñ rakkhā gayā
phir murattab kiye ga.e jazbāt
ishq ko ibtidā meñ rakkhā gayā
sañg-e-buniyād thī ḳhalāoñ kī
ek patthar havā meñ rakkhā gayā
ek koñpal sajā.ī achkan par
ek ḳhanjar qabā meñ rakkhā gayā
ek dariyā uThā ke laayā gayā
dasht-e-karb-o-balā meñ rakkhā gayā
mushtahar kī ga.iiñ duā.eñ bahut
aur asar bad-duā meñ rakkhā gayā
mujh ko taḳhlīq se guzārā gayā
aur ḳhudā kī razā meñ rakkhā gayā
inkishāfāt ho chuke saare
mo.ajaze ko anā meñ rakkhā gayā