lafz ko ilhām ma.anī ko sharar samjhā thā maiñ
dar-haqīqat aib thā jis ko hunar samjhā thā maiñ
raushnī thī aañkh thī manzar thā phir kuchh bhī na thā
haa.e kis āshob ko apnī nazar samjhā thā maiñ
āsmānoñ ko lapakte haiñ zamīñ-zāde sabhī
murġh-e-ādam-zād ko be-bāl-o-par samjhā thā maiñ
''kun'' kā afsūn-e-azal phūñkā gayā thā jis ghaḌī
mujh ko ab bhī yaad hai bār-e-digar samjhā thā maiñ
hai koii? jo mere is lamhe pe girya kar sake
jab mujhe bilkul samajh na thī magar samjhā thā maiñ
apne bachchoñ kī tarah us ne uḌāyā mujh ko saath
jis havā-e-tund-ḳhū ko dar-ba-dar samjhā thā maiñ
mujh pe farsūda aqā.ed kī ajab yalġhār thī
chhoTe chhoTe vasvasoñ ko ḳhair-o-shar samjhā thā maiñ
regzār-e-shab-gazīda tujh meñ tā-hadd-e-nazar
dhuup kā aaseb thā jis ko shajar samjhā thā maiñ
be-sar-o-sāmāniyoñ kī intihā thī 'ja.afarī'
jab dar-o-dīvār ko dīvār-o-dar samjhā thā maiñ
bāb-e-hairat jab talak khultā liyāqat-'ja.afarī'
qais ko farhād ko āshufta-sar samjhā thā maiñ