muslim huuñ par ḳhud pe qaabū rahtā hai
mere andar bhī ik hindū rahtā hai
koī jādūgar ke baazū kaaT bhī de
us ke haath meñ phir bhī jaadū rahtā hai
raat ga.e tak bachche dauḌte rahte haiñ
mere kamre meñ ik jugnū rahtā hai
'mīr' kā divānā 'ġhālib' kā shaidā.ī
merī bastī meñ ik sādhū rahtā hai
us ke laboñ par english vinglish rahtī hai
mere hoñT pe urdu urdu rahtā hai
aql hazāroñ bhes badaltī rahtī hai
ye dil mar jaane tak buddhū rahtā hai