mire liye to ye bekār hone vaalā hai

ye dil ki dard se bezār hone vaalā hai

maiñ us se ḳhvāb ke raste pe milne aayā huuñ

magar vo niiñd se bedār hone vaalā hai

jo faisla sar-e-darbār hone vaalā thā

vo faisla pas-e-dīvār hone vaalā hai

sunā hai yūsuf-e-sānī vahāñ nahīñ aayā

sunā hai ḳhatm vo bāzār hone vaalā hai

vo jis ke haath se qisse ne maut paa.ī hai

sunā hai sāhab-e-kirdār hone vaalā hai