kisī kā qahr kisī kī duā mile to sahī
sahī vo dushman-e-jāñ-āshnā mile to sahī
abhī to laal harī battiyoñ ko dekhte haiñ
mile kisī kī ḳhabar silsila mile to sahī
ye qaid hai to rihā.ī bhī ab zarūrī hai
kisī bhī samt koī rāsta mile to sahī
ye shām-e-sard meñ har sū alaav jalte haiñ
siyah ḳhamoshī meñ koī sadā mile to sahī
qabā-e-jism ki hai taar taar nazr kareñ
kabhī kahīñ vahī pāgal havā mile to sahī