mere afkār ne jis shai se jilā paa.ī hai
ishq kī zinda-dilī husn kī ra.anā.ī hai
shāḳh-e-gul meñ jo nazākat jo lahak aa.ī hai
terī bāhoñ kī lachak hai terī añgḌā.ī hai
phir ubharne lage na ḳhasta-māzī ke nuqūsh
lauh-e-dil par koī tasvīr ubhar aa.ī hai
ġham-o-andoh ke is daur meñ kyā aish-o-nishāt
shādyāne haiñ ḳhushī ke na vo shahnā.ī hai
zindagī hai ki bulātī hai taqāzoñ kī taraf
dil giraftār-e-ḳham-e-zulf-e-chalīpā.ī hai
rahiye ḳhāmosh to hālāt bigaḌ jaate haiñ
aur kuchh kahiye to andesha-e-rusvā.ī hai
dil vo kyā hai ki na ho jis meñ mohabbat kā junūn
sar vo kyā hai ki jo be-vaz.a jabīñ-sā.ī hai
maiñ ki darpesh hai mujh ko safar-e-dūr-o-darāz
aur ik vo haiñ ki un ko ġham-e-tanhā.ī hai
koī marham na mudāvā koī phāhā na davā
ziist oḌhe hue zaḳhmoñ kī ridā aa.ī hai
zarf-o-himmat se sivā dī nahīñ jaatī taklīf
itnā ġham dete haiñ jitnī ki shakebā.ī hai
'tāj' ye zor-e-bayāñ jo bhī suḳhan meñ kuchh hai
asar-e-tarbiyat-e-shevan-e-mīnā.ī hai