marhale aise bhī aksar aa.e
phuul barsā.e to patthar aa.e
ik faqat aap ke ho jaane se
kitne ilzām mere sar aa.e
jaam Thukrā diye jab bhī maiñ ne
sāmne mere samundar aa.e
ek chehre pe bashārat na milī
an-ginat chehroñ ko paḌh kar aa.e
bhuul jaate haiñ parinde maañ ko
jab bhī uḌne ko zarā par aa.e
aap kā shahr ki thā shahr-e-adab
be-adab is meñ bhī kuchh dar aa.e
ishq meñ 'tāj' kashish ho aisī
ḳhud hī mahbūb taḌap kar aa.e