ḳhātir se yā lihāz se maiñ maan to gayā

jhūTī qasam se aap kā īmān to gayā

dil le ke muft kahte haiñ kuchh kaam kā nahīñ

ulTī shikāyateñ huiiñ ehsān to gayā

Dartā huuñ dekh kar dil-e-be-ārzū ko maiñ

sunsān ghar ye kyuuñ na ho mehmān to gayā

kyā aa.e rāhat aa.ī jo kunj-e-mazār meñ

vo valvala vo shauq vo armān to gayā

dekhā hai but-kade meñ jo ai shaiḳh kuchh na pūchh

īmān kī to ye hai ki īmān to gayā

ifshā-e-rāz-e-ishq meñ go zillateñ huiiñ

lekin use jatā to diyā jaan to gayā

go nāma-bar se ḳhush na huā par hazār shukr

mujh ko vo mere naam se pahchān to gayā

bazm-e-adū meñ sūrat-e-parvāna dil mirā

go rashk se jalā tire qurbān to gayā

hosh o havās o taab o tavāñ 'dāġh' jā chuke

ab ham bhī jaane vaale haiñ sāmān to gayā