maiñ nahīñ jā pā.ūñgā yaaro sū-e-gulzār abhī

dekhnī hai āb-jū-e-zīst kī raftār abhī

kar chukā huuñ paar ye dariyā na jaane kitnī baar

paar ye dariyā karūñgā aur kitnī baar abhī

ghuum phir kar dasht-o-sahrā phir vahīñ le aa.e paañv

dil nahīñ hai shāyad is nazzāre se be-zār abhī

kāvish-e-paiham abhī ye silsila rukne na paa.e

jaan abhī āñkhoñ meñ hai aur paañv meñ raftār abhī

ai mire armān-e-dil bas ik zarā kuchh aur sabr

raat abhī kaTne ko hai milne ko bhī hai yaar abhī

jazba-e-dil dekhnā bhaTkā na denā raah se

muntazir hogā mirā bhī ḳhud mirā dil-dār abhī

hoñgī to is rah-guzar meñ bhī kamīñ-gāheñ hazār

phir bhī ye bār-e-safar kyuuñ ho mujhe dushvār abhī