tanhā tanhā sahmī sahmī ḳhāmoshī
jaisī haiñ āvāzeñ vaisī ḳhāmoshī
tanhā.ī meñ chauñkā detī hai aksar
sannāTe se bāteñ kartī ḳhāmoshī
be-maqsad mahfil se behtar tanhā.ī
be-matlab bātoñ se achchhī ḳhāmoshī
do āvāze hamrāhī ik raste kī
aur donoñ ke beach meñ chaltī ḳhāmoshī
chupke chupke ghar ko Dastī rahtī hai
darvāze kī dīvāroñ kī ḳhāmoshī
ḳhāmoshī ke zabt se Dartī āvāze
āvāzoñ ke shor se Dartī ḳhāmoshī