jo kal na thā vo aaj hai ai ham-shabīh-e-man
ab is kā kyā ilaaj hai ai ham-shabīh-e-man
āñkhoñ meñ ashk lab pe hañsī tis pe be-hisī
ye kaisā imtizāj hai ai ham-shabīh-e-man
hañs ke milo har ek se jis haal meñ milo
is shahr kā rivāj hai ai ham-shabīh-e-man
dekhā hai koī ḳhvāb azīzān-e-shahr ne
kai saal kā anaaj hai ai ham-shabīh-e-man
sab log mutma.in haiñ koī be-kalī nahīñ
ye kaun sā samāj hai ai ham-shabīh-e-man
maiñ ne kahā na thā ki yahāñ qadr-e-dil nahīñ
kyuuñ is pe bad-mizāj hai ai ham-shabīh-e-man