maiñ to saaya huuñ ghaTāoñ se utarne vaalā

hai koī pyaas ke sahrā se guzarne vaalā

tū samajhtā hai mujhe harf-e-mukarrar lekin

maiñ sahīfa huuñ tire dil pe utarne vaalā

tū mujhe apnī hī āvāz kā pāband na kar

maiñ to naġhma huuñ fazāoñ meñ bikharne vaalā

ai badalte hue mausam ke gurezāñ paikar

aks de jā koī āñkhoñ meñ Thaharne vaalā

maiñ huuñ dīvār pe likkhā huā kab se lekin

koī paḌhtā nahīñ raste se guzarne vaalā

jā rahā hai tire hoñToñ kī tamannā le kar

zindagī-bhar tirī āvāz pe marne vaalā