tum mil ga.e to koī gila ab nahīñ rahā
maiñ apnī zindagī se ḳhafā ab nahīñ rahā
pahle mirī nigāh meñ duniyā haqīr thī
maiñ apne sāthiyoñ se judā ab nahīñ rahā
ab bhī usī daraḳht ke nīche mileñge ham
saaya agarche us kā ghanā ab nahīñ rahā
tere qadam ne jaan kahānī meñ Daal dī
qissa hamārā be-sar-o-pā ab nahīñ rahā
ab merī apne āḳhirī dushman se jañg hai
maidāñ meñ koī mere sivā ab nahīñ rahā
ham ko usī dayār kī miTTī huī aziiz
naqshe meñ jis kā nām-pata ab nahīñ rahā