tumhārī yaad ke dīpak bhī ab jalānā kyā
judā hue haiñ to ahd-e-vafā nibhānā kyā
basīt hone lagī shahr-e-jāñ pe tārīkī
khulā huā hai kahīñ par sharāb-ḳhāna kyā
khaḌe hue ho miyāñ gumbadoñ ke saa.e meñ
sadā.eñ de ke yahāñ par fareb khānā kyā
har ek samt yahāñ vahshatoñ kā maskan hai
junūñ ke vāste sahrā o āshiyāna kyā
vo chāñd aur kisī āsmāñ pe raushan hai
siyāh raat hai us kī galī meñ jaanā kyā