dil kī galī meñ chāñd nikaltā rahtā hai
ek diyā ummīd kā jaltā rahtā hai
jaise jaise yādoñ ki lau baḌhtī hai
vaise vaise jism pighaltā rahtā hai
sargoshī ko kaan taraste rahte haiñ
sannāTā āvāz meñ Dhaltā rahtā hai
manzar manzar jī lo jitnā jī paao
mausam pal pal rañg badaltā rahtā hai
raakh huī jaatī hai saarī hariyālī
āñkhoñ meñ jañgal sā jaltā rahtā hai
tum jo ga.e to bhuul ga.e saarī bāteñ
vaise dil meñ kyā kyā chaltā rahtā hai