husn ko us ke ḳhat kā daaġh lagā
par hameñ to bahār o baaġh lagā
ghar se juuñ māh-e-be-hijāb nikal
ab to ai sham.a-rū charāġh lagā
bādshāhoñ kī bazm-e-ishrat se
apnā mat gosha-e-farāġh lagā
ātishīñ ashk ek dam jo thamā
ḳhāna-e-dīda be-charāġh lagā
le ḳhabar ab tū sāqī-e-sar-e-dast
ḳhushk hone mirā dimāġh lagā
kis ko ye ḳhūn-e-dil milī daulat
us ke hoñToñ se jā ayāġh lagā
dil-e-gum-gashta kā mire 'hasrat'
lag sake to kahīñ surāġh lagā