baat ruk ruk kar baḌhī phir hichkiyoñ meñ aa ga.ī
phone par jo ho na paa.ī chiTThiyoñ meñ aa ga.ī
sub.h do ḳhāmoshiyoñ ko chaa.e piite dekh kar
gungunī sī dhuup utrī pyāliyoñ meñ aa ga.ī
train ojhal ho ga.ī ik haath hiltā rah gayā
vaqt ruḳhsat kī udāsī chūḌiyoñ meñ aa ga.ī
adh-khilī rakhī rahī yuuñ hī vo novel god meñ
uTh ke pannoñ se kahānī siskiyoñ meñ aa ga.ī
chaar din hone ko aa.e kaal ik aayā nahīñ
chuppī mobile kī ab bechainiyoñ meñ aa ga.ī
baaT jo hai thak ga.ī chhat par khaḌī jab dopahar
shaam kī chādar lapeTe khiḌkiyoñ meñ aa ga.ī
raat ne yādoñ kī māchis se nikālī tīliyāñ
aur ik cigarette sulgī uñgliyoñ meñ aa ga.ī