jalā diyā hai ki is ne bujhā diyā hai mujhe
pa dil kī aag ne kandan banā diyā hai mujhe
tirī talab kī atā hai ki jis ne misl-e-charāġh
havā-e-dahr meñ jalnā sikhā diyā hai mujhe
maiñ sab se duur faqat apne aap meñ gum thā
kisī ke qurb ne sab se milā diyā hai mujhe
maiñ ek zarra-e-nāchīz kā.enāt meñ thā
ye kā.enāt sā kis ne banā diyā hai mujhe
so ab maiñ ohda-e-duniyā se kyā ġharaz rakhūñ
kisī ne mansab-e-dil par biThā diyā hai mujhe
tamām umr jo rakkhegā ziist ko raushan
tirī nazar ne vo manzar dikhā diyā hai mujhe
maiñ ek dasht thā ḳhud apne hī sarāb meñ gum
bas ek mauj ne dariyā banā diyā hai mujhe