na aah karte hue aur na vaah karte hue

jiyeñge zabt ko apnī panāh karte hue

vo ek rañg jo chhalkegā us kī āñkhoñ se

vo jiit legā mujhe ik nigāh karte hue

badal bhī saktī hai duniyā ye jāntā huuñ magar

maiñ haar jā.ūñgā us se nibāh karte hue

maiñ sab hisāb rakhūñgā safediyoñ se pare

ab apnī fard-e-amal ko siyāh karte hue

tire baġhair mujhe zindagī na raas aa.ī

so jī rahā huuñ maiñ ḳhud ko tabāh karte hue