jo apne aap ko sab kuchh samajh le
na jaane aap ko kab kuchh samajh le
mukarrar is liye samjhā rahā huuñ
bahut mumkin hai vo ab kuchh samajh le
nasīhat kā tujhe tab haq milegā
tū apne aap ko jab kuchh samajh le
duā ke ba.ad bhī ye iltijā hai
ziyāda kah gayā ab kuchh samajh le
yahāñ sab kuchh kise hāsil huā hai
jo hāsil hai use sab kuchh samajh le
taġhāful ko na itnā kaam meñ lā
guzar jā.egī ye shab kuchh samajh le