sirf bātoñ se bahal jaane kā qaa.il to nahīñ
dil mirā saada hai ehsās se ġhāfil to nahīñ
vaar kartā hai nazar se yahī qātil to nahīñ
choT khā kar jo taḌaptā hai mirā dil to nahīñ
shor-o-ġhul baḌhtā hī jaatā hai mire kānoñ meñ
dil meñ jo hai vahī tūfāñ lab-e-sāhil to nahīñ
qāfile vāloñ ne bistar jahāñ apne khole
sach to ye hai vo mire naam kī manzil to nahīñ
sāmnā ho to pata bhī chale phir kaun hai kyā
maiñ ne maanā ki koī mire muqābil to nahīñ
mahfileñ aur bhī haiñ husn-o-adā kī lekin
terī mahfil kī tarah ab koī mahfil to nahīñ
ham to tayyār haiñ ik hashr uThāne ke liye
aap ḳhud hī kisī tūfān se ġhāfil to nahīñ
duur hī se nazar aa jaatā hai 'jāmī' terā
bhiiḌ meñ rah ke bhī vo bhiiḌ meñ shāmil to nahīñ