koī aahaT koī sargoshī sadā kuchh bhī nahīñ
ghar meñ ik behis ḳhamoshī ke sivā kuchh bhī nahīñ
naam ik nāyāb sā likhā thā vo bhī miT gayā
ab hathelī par lakīroñ ke sivā kuchh bhī nahīñ
be-chhue ik lams kā ehsās ik ḳhāmosh baat
us ke mere biich āḳhir thā bhī kyā kuchh bhī nahīñ
dostī kaisī vafā kaisī takalluf bartaraf
aap kuchh bhī hoñ magar kyā dūsrā kuchh bhī nahīñ
dekhnā ye hai ki milne kis se pahle kaun aa.e
mere ghar se us ke ghar kā fāsla kuchh bhī nahīñ