yuuñ baḌī der se paimāna liye baiThā huuñ
koī dekhe to ye samjhe ki piye baiThā huuñ
āḳhirī naav na aa.ī to kahāñ jā.ūñgā
shaam se paar utarne ke liye baiThā huuñ
mujh ko mālūm hai sach zahr lage hai sab ko
bol saktā huuñ magar hoñT siye baiThā huuñ
log bhī ab mire darvāze pe kam aate haiñ
maiñ bhī kuchh soch ke zanjīr diye baiThā huuñ
zindagī bhar ke liye ruuTh ke jaane vaale
maiñ abhī tak tirī tasvīr liye baiThā huuñ
kam se kam ret se āñkheñ to bacheñgī 'qaisar'
maiñ havāoñ kī taraf piiTh kiye baiThā huuñ