zindagī kar ga.ī tūfāñ ke havāle mujh ko
ai ajal kashmakash-e-ġham se chhuḌā le mujh ko
kuchh to le kaam taġhāful se vafā ke paikar
ye tirā pyaar kahīñ maar na Daale mujh ko
vaah rī qismat ki kahāñ manzil-e-maqsūd milī
jab maza dene lage paañv ke chhāle mujh ko
āḳhirī vaqt talak saath andheroñ ne diyā
raas aate nahīñ duniyā ke ujāle mujh ko
koī bhī mohsin o rahbar hī nahīñ hai merā
yuuñ to 'dānish' haiñ bahut chāhne vaale mujh ko