savāl-e-dīd pe tevrī chaḌhā.ī jaatī hai
majāl-e-dīd pe bijlī girā.ī jaatī hai
ḳhudā ba-ḳhair kare zabt-e-shauq kā anjām
naqāb merī nazar se uThā.ī jaatī hai
isī ko jalva-e-īmān-e-ishq kahte haiñ
hujūm-e-yās meñ bhī aas paa.ī jaatī hai
ab aa ga.e ho to aur ik zarā Thahar jaao
abhī abhī mirī mayyat uThā.ī jaatī hai
mire qayās ko apnī talāsh meñ kho kar
mire havās ko duniyā dikhā.ī jaatī hai