jazb-e-dil jab ba-rū-e-kār aayā

har nafas se payām-e-yār aayā

maut kā intizār thā aa.ī

jā.iye ab mujhe qarār aayā

jab kisī ne liyā tumhārā naam

girya be-qasd-o-iḳhtiyār aayā

be-qarārī meñ ab ye hosh nahīñ

kis ke dar par tujhe pukār aayā

farsh-e-gul phir bichhā rahī hai nasīm

aa.iye mausam-e-bahār aayā

aaj ham pī sake na vo aañsū

un ke aage jo baar baar aayā

ḳhair to hai ki aap ke dar se

aaj 'fānī' ummīd-vār aayā