Nazeer Akbarabadi

aish kar KHuban mein ai dil shadmani phir kahan

Nazeer Akbarabadi

Delhi, India

1735-1830

aish kar ḳhūbāñ meñ ai dil shādmānī phir kahāñ

shādmānī gar huī to zindagānī phir kahāñ

jis qadar piinā ho le paanī un ke haath se

āb-e-jannat to bahut hogā ye paanī phir kahāñ

lazzateñ jannat ke meve bahut hoñgī vahāñ

phir ye mīThī gāliyāñ ḳhūbāñ khānī phir kahāñ

vaañ to haañ hūroñ ke gahne ke bahut hoñge nishāñ

in parī-zādoñ ke chhalloñ nishānī phir kahāñ

ulfat-o-mahr-o-mohabbat sab haiñ jīte-jī ke saath

mehrbāñ uTh ga.e ye mehrbānī phir kahāñ

vaa.iz o nāseh bakeñ to un ke kahne ko na maan

dam ġhanīmat hai miyāñ ye naujavānī phir kahāñ

paḌe chup ho ke jab shahr-e-ḳhamoshāñ meñ 'nazīr'

ye ġhazal ye reḳhta ye sher-ḳhvānī phir kahāñ

Top Urdushayar.com