muntazir us ke dilā tā-ba-kujā baiThnā
shaam huī ab chalo sub.h phir aa baiThnā
hosh rahā ne qarār diin rahā aur na dil rahā
paas butoñ ke hameñ ḳhuub na thā baiThnā
lutf se ai dil tujhe us ke jo abrū biThā.e
baiThiyo lekin bahut paas na jā baiThnā
dil kī hamārī ġharaz bāñdhe hai kyā band band
shoḳh kā vo khol kar band-e-qabā baiThnā
kūche meñ us shoḳh ke jaate to ho ai nazīr
jul meñ kahīñ apnī chaah tum na jatā baiThnā