miyāñ dil tujhe le chale husn vaale
kaho aur kiyā jā ḳhudā ke havāle
idhar aa zarā tujh se mil kar maiñ ro luuñ
tū mujh se zarā mil ke aañsū bahā le
chalā ab to saath un ke tū bebasī se
lagā mere pahlū meñ furqat ke bhāle
ḳhabar-dār un ke sivā zulf o ruḳh ke
kahīñ mat nikalnā añdhere ujāle
tire aur bhī haiñ talabgār kitne
mabādā koī tujh ko vaañ se uḌā le
kahīñ qahr aisā na kiijo ki mujh ko
bulāne paḌeñ faal ta.avīz vaale
kisī kā to kuchh bhī na jāvegā lekin
paḌeñge mujhe apne jiine ke laale
tirī kuchh sifārish maiñ un se bhī kar duuñ
karegā tū kyā yaad mujh ko bhulā le
suno dilbaro gul-ruḳho mah-jabīno
maiñ tum paas aayā huuñ ik iltijā le
ḳhudā kī razā yā mohabbat se apnī
paḌā ab to aa kar tumhāre ye paale
tum apne hī qadmoñ tale us ko rakhiyo
tasallī dilāse meñ har dam sambhāle
koī us ko taklīf aisī na diijo
ki jis meñ ye ro kar kare aah naale
tumhāre ye sab naaz uThāvegā lekin
vahī bojh rakhiyo jise ye uThā le
agar dastaras ho to kiije munādī
ki phir koī siine meñ dil ko na paale
'nazīr' aah dil kī judā.ī burī hai
baheñ kyuuñ na āñkhoñ se aañsū ke naale