bagūle uTh chale the aur na thī kuchh der āñdhī meñ
ki ham se yaar se aa ho ga.ī muDbheḌ āñdhī meñ
jatā kar ḳhaak kā uḌnā dikhā kar gard kā chakkar
vahīñ ham le chale us gul-badan ko gher āñdhī meñ
raqīboñ ne jo dekhā ye uḌā kar le chalā us ko
pukāre haa.e ye kaisā huā andher āñdhī meñ
vo dauḌe to bahut lekin unheñ āñdhī meñ kyā sūjhe
zi-bas ham us parī ko laa.e ghar meñ gher āñdhī meñ
chaḌhā koThe pe darvāze ko muuñd aur khol kar parde
lagā chhātī liye bose kyā hat pher āñdhī meñ
vo koThe kā makāñ vo kaalī āñdhī vo sanam gul-rū
ajab rañgoñ kī Thahrī aa ke herā-pher āñdhī meñ
uThā kar taaq se shīsha lagā chhātī se dilbar ko
nashoñ meñ aish ke kyā kyā kiyā dil sair āñdhī meñ
kabhī bosa kabhī añgiyā pe haath aur gaah siine par
lage luTne maze ke sañgtare aur bair āñdhī meñ
maze aish o tarab lazzat lage yuuñ TuuT kar girne
ki jaise TuuT kar mevoñ ke hoveñ Dher āñdhī meñ
raqīboñ kī maiñ ab ḳhvārī ḳharābī kyā likhūñ baare
bharī nathnoñ meñ un ke ḳhaak das das ser āñdhī meñ
kisī kī uḌ ga.ī pagḌī kisī kā phaT gayā dāman
ga.ī Dhaal aur kisī kī gir paḌī shamshīr āñdhī meñ
'nazīr' āñdhī meñ kahte haiñ ki aksar dev hote haiñ
miyāñ ham ko to le jaatī haiñ pariyāñ gher āñdhī meñ