vāpas ghar jā ḳhatm huā
khel-tamāshā ḳhatm huā
pīchhe muḌ kar kyā dekho
jo pīchhe thā ḳhatm huā
dhīre dhīre dard uThā
rafta rafta ḳhatm huā
tum bhī haare merī haar
jaane kyā kyā ḳhatm huā
sahrā dariyā jañgal shahr
lambā rasta ḳhatm huā
pīpal bargad panghaT par
aanā jaanā ḳhatm huā
kis kī yādeñ kis kā naam
dard kā rishta ḳhatm huā
aag bagūla hote ho
lo ye qissa ḳhatm huā