shiddat-e-karb se karāh uThā
jab uThā dard-e-be-panāh uThā
mere aage chalā na zor-e-tilism
mere pīchhe ġhubār-e-rāh uThā
be-sabab raat bhar charāg jale
maiñ dhuāñ ban ke ḳhvāh-maḳhvāh uThā
dil baġhāvat pe kab thā āmāda
sar thā jo pesh-e-bādshāh uThā
chhoḌ de aaj sharm kā dāman
ai parī-zād ab nigāh uThā
mujh se qaa.em thī bazm kī raunaq
maiñ uThā farsh-e-ḳhānqāh uThā
ai jahāñgīr apnā adl to dekh
koī bhar kar yahāñ se aah uThā