dair meñ yā haram meñ guzregī
umr tere hī ġham meñ guzregī
kuchh umīd-e-karam meñ guzrī umr
kuchh umīd-e-karam meñ guzregī
zindagī yād-e-dost hai yaanī
zindagī hai to ġham meñ guzregī
ab karam kā ye mā-hasal hai ki umr
yād-e-ahd-e-sitam meñ guzregī
dil ko shauq-e-nashāt-e-vasl na chheḌ
ġham meñ guzrī hai ġham meñ guzregī
hasrat-e-dam-ba-dam meñ guzrī umr
ibrat-e-dam-ba-dam meñ guzregī
hashr kahte haiñ jis ko ai 'fānī'
vo ghaḌī sharah-e-ġham meñ guzregī