jī DhūñDhtā hai ghar koī donoñ jahāñ se duur
is aap kī zamīñ se alag āsmāñ se duur
shāyad maiñ dar-ḳhur nigah-e-garm bhī nahīñ
bijlī taḌap rahī hai mire āshiyāñ se duur
āñkheñ churā ke aap ne afsāna kar diyā
jo haal thā zabāñ se qarīb aur bayāñ se duur
tā-arz-e-shauq meñ na rahe bandagī kī laag
ik sajda chāhtā huuñ tire āstāñ se duur
hai man.a rāh-e-ishq meñ dair-o-haram kā hosh
ya.anī kahāñ se paas hai manzil kahāñ se duur