Daro na tum ki na sun le kahīñ ḳhudā merī
ki rū-shanās-e-ijābat nahīñ duā merī
vo tum ki tum ne jafā kī to kuchh burā na kiyā
vo maiñ ki zikr ke qābil nahīñ vafā merī
chale bhī aao ki duniyā se jā rahā hai koī
suno ki phir na sunoge tum iltijā merī
kuchh aisī yaas se hasrat se maiñ ne dam toḌā
jigar ko thaam ke rah rah ga.ī qazā merī
ḳhudā ne zahr kī tāsīr baḳhsh dī 'fānī'
taras ga.ī thī asar ko bahut duā merī