lāla-zāroñ meñ zard phuul huuñ maiñ
fasl-e-gul hai magar malūl huuñ maiñ
chāñd-tāroñ ko rashk hai mujh par
tere qadmoñ kī sirf dhuul huuñ maiñ
kyuuñ mujhe sañgsār karte ho
kab ye maiñ ne kahā rasūl huuñ maiñ
nūr-e-sar-mastī-e-abad huuñ magar
mai-e-shaffāf meñ hulūl huuñ maiñ
ranj-o-ġham kyuuñ na merī qadr kareñ
be-ġharaz aur bā-usūl huuñ maiñ
chāñdnī kyā payām laa.ī hai
aaj kuchh aur bhī malūl huuñ maiñ
sab ke haq meñ huuñ shāḳh-e-gul lekin
sirf apne liye babūl huuñ maiñ
mujh pe hī yūrish-e-alam kyuuñ hai
jab haqīqat meñ terī bhuul huuñ maiñ
ġham-e-hijrāñ hī vo sahī 'ābid'
koī to hai jise qubūl huuñ maiñ