ho kaash vafā vāda-e-fardā-e-qayāmat
aa.egī magar dekhiye kab aa.e qayāmat
suntā huuñ ki hañgāma-e-dīdār bhī hogā
ek aur qayāmat hai ye bālā-e-qayāmat
ham dil ko in alfāz se karte haiñ muḳhātab
ai jalva-gah-e-anjuman-ārā-e-qayāmat
allāh bachā.e ġham-e-furqat vo balā hai
munkir kī nigāhoñ pe bhī chhā jaa.e qayāmat
'fānī' ye magar rāh-e-mohabbat kī zamīñ hai
har zarre meñ hai vusat-e-sahrā-e-qayāmat