ik fasāna sun ga.e ik kah ga.e
maiñ jo royā muskurā kar rah ga.e
yā tire mohtāj haiñ ai ḳhūn-e-dil
yā inhīñ āñkhoñ se dariyā bah ga.e
maut un kā muñh hī taktī rah ga.ī
jo tirī furqat ke sadme sah ga.e
tū salāmat hai to ham ai dard-e-dil
mar hī jā.eñge jo jiite rah ga.e
phir kisī kī yaad ne taḌpā diyā
phir kaleja thaam kar ham rah ga.e
uTh ga.e duniyā se 'fānī' ahl-e-zauq
ek ham marne ko zinda rah ga.e