mirī chaah meñ mire ishq meñ tū kabhī kisī se laḌā nahīñ

isī bhuul kā ye azaab hai tū mirā nahīñ maiñ tirā nahīñ

thā gulāb maiñ thī ye aarzū tire gesuoñ meñ khilūñ kabhī

nahīñ khil sakā to ye jaan le ye tirī hai merī ḳhatā nahīñ

tirī yaad mujh se bahut laḌī mire añg añg meñ zaḳhm hai

maiñ taḌaptā rahtā huuñ dard se tujhe fikr merī zarā nahīñ

mirā dil to tere hī paas hai tū ise khañgāl ke dekh le

vahāñ tū hī tū hai har ik taraf vahāñ kuchh bhī tere sivā nahīñ

tire ishq se mujhe kyā milā mirī zindagī huī maut sī

mujhe ab talāsh sukūñ kī hai mujhe ab junūn-e-hinā nahīñ

mujhe aisī zaat se ishq hai jo ho mehrbān to maut kab

hai fanā.iyat meñ nihāñ baqā hai baqā agar to fanā nahīñ