guzar gayā intizār had se ye vāda-e-nā-tamām kab tak
na marne degī mujhe sitamgar tirī tamannā-e-ḳhām kab tak
ajal mirā itnā kaam kar de ki kaam merā tamām kar de
rahe koī zindagī ke hāthoñ jahāñ meñ rusvā-e-ām kab tak
vo aa.e yā vaade par na aa.e balā se qismat jo kuchh dikhā de
magar hameñ dekhnā to ye hai ki aaj hotī hai shaam kab tak
ye bahas o takrār chhoḌ de aa ye zohd kā ahd toḌ de
rahegī ai mudda.ī-e-hurmat sharāb-e-duniyā harām kab tak