aañkh uThā.ī hī thī ki khaa.ī choT
bach ga.ī aañkh dil pe aa.ī choT
dard-e-dil kī unheñ ḳhabar kyā ho
jāntā kaun hai parā.ī choT
aa.ī tanhā na ḳhāna-e-dil meñ
dard ko apne saath laa.ī choT
teġh thī haath meñ na ḳhanjar thā
us ne kyā jaane kyā lagā.ī choT
yuuñ na qātil ko jab yaqīñ aayā
ham ne dil khol kar dikhā.ī choT
aur kyā karte ham balā-kash-e-ġham
jo paḌī dil pe vo uThā.ī choT
kahīñ chhuptī bhī hai lagī dil kī
laakh 'fānī' ne go chhupā.ī choT