ruuTh jaane kī ādateñ na ga.iiñ
dil jalāne kī ādateñ na ga.iiñ
zaḳhm khā kar bhī tujh se naam tirā
gungunāne kī ādateñ na ga.iiñ
pyaar se jo bhī mil gayā us ko
dukh sunāne kī ādateñ na ga.iiñ
chāñd kī sharm se naqāboñ meñ
muñh chhupāne kī ādateñ na ga.iiñ
do diloñ ko ujaaḌ ke hañsnā
na zamāne kī ādateñ na ga.iiñ
chāñd jaisā har ik hasīñ chehra
dil ko bhāne kī ādateñ na ga.iiñ
bīsiyoñ baar aazmā ke hameñ
āzmāne kī ādateñ na ga.iiñ
raat ke pichhle pahar ai 'ayyāz'
ghar ko aane kī ādateñ na ga.iiñ