ġhamoñ meñ Dhaal gayā lauT kar nahīñ aatā
jo pichhle saal gayā lauT kar nahīñ aayā
bichhaḌ gayā hai vo ḳhushiyāñ sameT kar aur ġham
mujhe sambhāl gayā lauT kar nahīñ aayā
ajab tilism hai us kī hasīn āñkhoñ meñ
udhar ḳhayāl gayā lauT kar nahīñ aayā
maiñ ḳhud bhī soch meñ gum huuñ ki tere aane se
kidhar malāl gayā lauT kar nahīñ aayā
ajiib shaḳhs thā khiñch kar salīb-e-vaqt pe vo
hameñ ujaal gayā lauT kar nahīñ aayā
kaTā vo shahr se phir jab tirī galī se kaTā
shikasta haal gayā lauT kar nahīñ aayā
sitam-zarīf rivājoñ kī oT meñ ai 'ayāz'
mirā hilāl gayā lauT kar nahīñ aayā