chhoTe baḌe bure bhale din raat ke liye

har shai hai sirf sūrat-e-hālāt ke liye

maujūd haiñ is ā.īna-ḳhāna meñ har taraf

mere hī aks merī mulāqāt ke liye

jo baat sochne kī hai kab sochtā huuñ meñ

kab sochtā hai koī merī zaat ke liye

phirtī haiñ dil meñ sūrateñ qurb-o-javār kī

ābād hai ye shahr mazāfāt ke liye

chhoTe se peḌ kī jaḌeñ jaatī haiñ duur duur

sahrā meñ rizq DhūñDne har paat ke liye

maiñ ruk gayā chaḌhī huī naddī ke sāmne

kuchh vaqt mere paas thā barsāt ke liye

ham log haiñ saleT pe likkhe hue 'nasīm'

miTnā paḌegā agle savālāt ke liye